Það er áhugi á Heimi Hallgrímssyni, fyrrum þjálfara íslenska karlalandsliðsins, víða um heim, bæði frá landsliðum og félagsliðum.
Heimir hætti með landslið Jamaíka á dögunum eftir að hafa komið liðinu á Copa America en þar datt liðið úr leik í riðlakeppninni. Hann er því frjáls ferða sinna.
Samkvæmt heimildum 433.is er áhugi á Heimi víða um heim en hingað til hefur hann verið hvað mestur frá landsliði Ekvador. Þá er einnig áhugi frá fleiri landsliðum.
Ekvador er í 30. sæti heimslista FIFA og ljóst að það yrði spennandi verkefni. Til samanburðar er Jamaica í 53. sæti listans.
Heimir hefur átt ansi farsælan þjálfaraferil. Það vita auðvitað allir hvað hann gerði með Strákana okkar en hann hefur einnig stýrt Al-Arabi í Katar um þriggja ára skeið, auk þess að stýra Jamaíka nú síðast.