Líkurnar á að Casemiro, miðjumaður Manchester United, fari til Sádi-Arabíu í sumar fara hverfandi samkvæmt Sky Sports.

Hinn 32 ára gamli Casmiro gekk í raðir United frá Real Madrid fyrir tveimur árum og átti frábært fyrsta tímabil. Það sama er þó alls ekki hægt að segja um síðustu leiktíð.

Brassinn er með 350 þúsund pund í vikulaun á Old Trafford og vill félagið losna við hann, bæði vegna launanna og enduruppbyggingar sem stendur yfir hjá United.

Var vonast til að félag í Sádí gæti keypt hann en samkvæmt nýjustu fréttum eru minni líkur á því.

Það kemur þó fram að það sé alls ekki útilokað að Casemiro yfirgefi United yfirhöfuð síðar í sumar.