Kristbjörg Jónasdóttir, eiginkona Arons Einars Gunnarssonar, leyfði fylgjendum að spyrja sig spurninga á Instagram í gær.

Þar var hún meðal annars spurð að því hvort fjölskyldan væri flutt heim til Íslands, þar sem þau dvelja þessa stundina. Samningur Arons við Al-Arabi í Katar rann út í vor og hann því frjáls ferða sinna.

„Við vitum ekki alveg ennþá okkar framtíðarplön,“ sagði Kristbjörg við þeirri spurningu.

Það er óljóst hvort Aron taki annað tímabil erlendis eða komi heim, en hann er löngu búinn að tilkynna það að hann muni spila með uppeldisfélagi sínu, Þór, áður en ferlinum lýkur.

Samkvæmt heimildum 433.is eru Þórsarar vongóðir um að fá Aron núna í sumgarglugganum.

Aron hefur átt frábæran feril hingað til. Fyrir tímann hjá Al-Arabi var hann í fjölda ára á Englandi í bæði úrvalsdeildinni og Championship.

Þá hefur hann spilað 103 A-landsleiki fyrir Íslands hönd og borið fyrirliðabandið þar í mörg ár.