Sóknarmaðurinn Michy Batshuayi er að leika sér að eldinum þessa dagana en hann er að kveðja Fenerbahce í Tyrklandi.

Batshuayi hefur raðað inn mörkum fyrir Fenerbahce undanfarin tvö tímabil en var fyrir það einnig á láni hjá Besiktas þar í landi.

Allar líkur eru á að Batshuayi framlengi ekki við Fenerbahce en hann er í viðræðum við Galatasaray sem fer illa í ansi marga.

Það er mikill rígur á milli Galatasaray og Fenerbahce og væri Batshuayi í raun að skapa ákveðna hættu með því að skrifa undir hjá hinum risunum.

BeIN Sports segir að Batshuayi sé að skrifa undir samning við Galatasaray og mun hann þéna 50 þúsund pund á viku.

Bæði lið leika í borginni Istanbul og eins vinsæll og Belginn var á meðal stuðningsmanna Fenerbahce þá verður því gleymt strax í næsta leik.

Það hjálpar ekki að Batshuayi hafi spilað fyrir Besiktas sem er einnig í Istanbul og er ljóst að hann verður alls ekki vinsælasti maður borgarinnar ef þessi skipti ganga í gegn.