Enska landsliðið fann sig engan veginn í leik gegn Dönum á Evrópumótinu í knattspyrnu, leiknum lauk með 1-1 jafntefli.
Englendingar komust yfir í fyrri hálfleik með marki frá Harry Kane, óverðskuldað var það en Kyle Walker gerði vel í undirbúningi marksins.
Þegar um tíu mínútur voru eftir af fyrri hálfleik jafnaði Morten Hjulmand með frábæru marki. Hann skaut af 25 metra færi og boltinn í stöng og inn.
Ljóst var að Gareth Southgate var ósáttur með leikmenn enska landsliðsins en í síðari hálfleik tók hann Trent Alexander-Arnold, Harry Kane, Phil Foden og Bukayo Saka af velli.
Það skilaði þó litlu því þeir dönsku voru sterkari en náðu ekki að nýta sér yfirburðina.
England er með fjögur stig og komið í góða stöðu en Danir eru með tvö stig og mæta Serbíu í næsta leik á meðan England mætir Slóveníu.