Barcelona er sagt hafa sett sig í samband við Bayer Leverkusen með það í hyggju að reyna að krækja í Jeremie Frimpong, leikmann liðsins. Spænski miðillinn Sport segir frá.
Vængbakvörðurinn knái átti frábært tímabil með Þýskalands- og bikarmeisturum Leverkusen. Hann skoraði 14 mörk og lagði upp 12.
Hinn 23 ára gamli Frimpong er metinn á 50 milljónir evra en Barcelona getur ekki reitt fram þá upphæð vegna fjárhagsvandræða. Félagið vinnur þó í lausnum og samkvæmt Sport er það til í að láta Ansu Fati á móti, upp í kaupverðið.
Leverkusen er til í að skoða leikmenn á móti en gæti þó sennilega selt Frimpong fyrir fullt verð einnig þar sem hann hefur verið orðaður við lið eins og Manchester United, Liverpool, Arsenal, og Manchester City.