Bayern Munchen hefur áhuga á Bruno Fernandes, fyrirliða Manchester United og gæti reynt að fá hann í sumar. Independent greinir frá.
Fernandes hefur verið hjá United síðan í janúar 2020 og verið hvað besti leikmaður liðsins síðan. Nú eru hins vegar fréttir á kreiki um að kappinn vilji fara annað í sumar.
Talið er að Fernandes færi þá í aðra deild og Bayern gæti því reynst kostur. Liðið vill endurheimta Þýskalandsmeistaratitilinn á næstu leiktíð.
United vill að sjálfsögðu ekki missa Fernandes en Erik ten Hag, stjóri liðsins, tjáði sig um Portúgalann í dag.
„Eins og ég sagði í síðustu viku er hann mjög mikilvægur leikmaður fyrir okkur. Öll árin sín hérna hefur hann verið mjög mikilvægur. Hann býr til flest færin í deildinni og er með svo mörg mörk og stoðsendingar,“ sagði Hollendingurinn.
Samningur Fernandes rennur út 2026 en möguleiki er á árs framlengingu.
