Gylfi Þór Sigurðsson var að vonum svekktur eftir 1-0 tap Vals gegn Stjörnunni í Bestu deildinni í kvöld.
Valsarar voru manni færri frá því seint í fyrri hálfleik þegar Bjarni Mark Antonsson fékk sitt annað gula spjald. Skömmu síðar komst Stjarnan yfir.
„Þetta var svekkjandi. Þetta var möguleiki fyrir okkur að sækja þrjú stig stig gegn góðu liði eftir lélega frammistöðu á móti Fylki,“ sagði Gylfi við Stöð 2 Sport eftir leik.
„Mér fannst við byrja leikinn vel en þetta var erfitt eftir rauða spjaldið og svo kom markið rétt fyrir hálfleik. Það er erfitt að taka þessu en svona er fótboltinn stundum.“
Sjálfur er Gylfi kominn á góðan stað í endurkomu sinni.
„Skrokkurinn er bara fínn. Þetta voru ekki eðlilegar 90 mínútur. Við liggjum mikið og ekki mikið um hlaup fram og til baka. Þetta var mikið til hliðar og stutt hlaup.“
