Það eru ansi góðar líkur á því að framherjinn Victor Osimhen sé að kveðja lið Napoli í sumarglugganum.
Osimhen er einn öflugasti framherji Evrópu en hann er á mála hjá Napoli sem hefur átt mjög erfitt tímabil í vetur.
John Obi Mikel, fyrrum leikmaður Chelsea og landi Osimhen, hefur rætt við sóknarmanninn og hvetur hann til að ganga í raðir þeirra bláklæddu.
Mikel telur að Osimhen hafi áhuga á að spila fyrir Chelsea og er sannfærður um að hann myndi hjálpa liðinu mikið þegar kemur að markaskorun.
,,Ég er nokkuð viss um að það sé áhugi bæði frá Chelsea og Osimhen,“ sagði Mikel.
,,Ég held að hann elski þetta félag, hann vill koma og vill feta í mín fótspor sem nígerískur leikmaður Chelsea. Victor Moses og Celestine Babayaro voru einnig þarna, við erum nokkrir.“
,,Ég er að reyna að ýta honum í rétta átt, ég vona að hann skrifi undir því hann myndi hjálpa félaginu svo mikið.“