Héraðssaksóknari hefur fellt niður mál gegn knattspyrnumanninum Alberti Guðmundssyni. Þetta kemur fram hjá RÚV þar lögmaður Alberts, Vilhjálmur H. Vilhjálmsson, staðfestir að málið hafi verið fellt niður á fimmtudaginn þar sem það þótti ekki líklegt til sakfellingar.

Það var í fyrrasumar sem Albert var kærður fyrir kynferðisbrot en greint var frá því opinberlega í ágúst. Í. kjölfarið sendi Albert frá sér yfirlýsingu þar sem hann lýsti sig saklausan.

Hann hefur ekki verið valinn í íslenska landsliðið síðan KSÍ var upplýst um kæruna, en málið hafði þó ekki áhrif á stöðu Alberts hjá knattspyrnuliðinu Genóa á Ítalíu.

Málið fór í ákærumeðferð í desember eftir að lögregla lauk rannsókn sinni, en nú er ljóst að engin ákæra verður gefin út. Kærandi hefur þó mánuð til að kæra ákvörðun um niðurfellingu til Ríkissaksóknara, en óljóst er á þessu stigi hvort slíkt verði gert. .