Hjörvar Hafliðason, Dr. Football talar fyrir þvi að Þorvaldur Örlygsson eða Guðni Bergsson verði næsti formaður KSÍ. Þeir berjast um stólinn við Vigni Má Þormóðsson.

Kosið verður til formanns á laugardag á ársþingi KSÍ.

Guðni fékk mikla lofræðu í þætti dagsins en hann sagði af sér sem formaður KSÍ haustið 2021. „Toddi líka góður og Vignir ábyggilega líka, þú þarft að vera með mann sem getur hitt forseta portúgalska sambandsins. Toddi er með feril eins og Guðni,“ segir Hjörvar Hafliðason.

Þorvaldur og Guðni eru fyrrum atvinnumenn og landsliðsmenn á meðan Vignir hefur starfað í kringum fótboltann um langt skeið og sat í stjórn KSÍ í tólf ár.

Hjörvar segir að Vignir yrði líkur Hannesi Jónssyni formanni KKÍ. „Svo er Vignir, Vigginn er eins og körfuboltinn sem bjó sér til sinn formann í Hannesi. Vignir væri eins og hann,“ sagði Hjörvar.

„Vignir er kannski ekki stærsti karakterinn í bransanum, Vignir hefur þetta ekki sem Guðni og Toddi hafa. Þú myndir finna fyrir því þegar þeir labba inn í herbergið.“

„Vignir er eflaust yndislegur en er eins og búningastjóri frekar en formaður sambandsins,“ sagði Hjörvar einnig.