Gunnar Birgisson og Tómas Steindórsson voru gestir þeirra Helga Fannars Sigurðssonar og Hrafnkels Freys Ágústssonar í nýjasta þætti af Íþróttavikunni á 433.is.

Arnar Gunnlaugsson, þjálfari Víkings, var heldur óvænt orðaður við skoska liðið Hearts á dögunum en það er þó ansi ólíklegt að hann taki skrefið þangað nú.

„Ég veit ekki hvaðan þetta kom. Kannski þegar Valur spilaði við St. Mirren í sumar, þeir hafi farið að orða besta þjálfarann héðan þangað út. En ég veit ekki hversu spennandi Hearts er,“ sagði Hrafnkell um málið í þættinum.

Arnar var sterklega orðaður við Norrköping eftir síðustu leiktíð en Gunnar hélt í kjölfarið að fleiri félög yrðu á eftir honum.

„Það hefur komið manni á óvart hvað hefur lítið verið af einhverjum alvöru orðrómum í kringum Arnar. Það til dæmis virtist enginn frá Lyngby heyra í honum eða Víkingum þegar þeir voru að leita að þjálfara.

En það vita allir hversu góður þjálfari hann er og ef hann langar virkilega út, þá fær hann bróður sinn til að setja hjólinn af stað og koma sér eitthvað erlendis,“ sagði Gunnar.

Umræðan í heild er í spilaranum.