Gabriel, varnarmaður Arsenal, er alls ekki sár út í framherjann Erling Haaland eftir leik við Manchester City um helgina.

Haaland kastaði boltanum í haus Gabriel eftir jöfnunarmark heimaliðsins í viðureigninni sem lauk með 2-2 jafntefli.

Mikið hefur verið gert úr atvikinu en Gabriel er sjálfur nokkuð rólegur og hefur ekkert illt um Haaland að segja.

,,Ég man ekki einu sinni eftir þessu. Þetta er eðlilegt, þeir voru ánægðir eftir að hafa jafnað á lokasekúndunum,“ sagði Gabriel.

,,Það voru þeir sem spiluðu á heimavelli svo þeirra starf var að vinna en okkar lið varðist virkilega vel.“

,,Þetta er búið og við munum bíða eftir þeim á okkar heimavelli.“