Het Laatste Nieuws í Belgíu segir að Freyr Alexandersson hafi farið til Cardiff í síðustu viku til að ræða við forráðamenn félagsins um að taka við þjálfun liðsins. Freyr var í gær orðaður við starfið í ensku Championship deildinni.

Blaðið segir einnig að Freyr hafi logið að leikmönnum sínum að hann væri veikur og kæmi ekki á æfingu dagsins. Á sama tíma á hann að hafa farið til Wales og rætt við Cardiff.

Freyr hefur í níu mánuði stýrt Kortrijk í Belgíu með góðum árangri. Hann var nálægt því að taka við Union St Gallen í sumar en Het Laatste Nieuws segir ástæðu þess vera að það hafi ekki gengið upp að Freyr tæki aðstoðarþjálfara sinn með sér.

Breska ríkisútvarpið segir að Freyr sé einn þeirra sem okmi til greina sem næsti stjóri Cardiff City í Championship deildinni. Erol Bulut var rekinn úr starfi og er liðið að leita að þjálfara.

Freyr hefur áður verið nefndur til sögunnar sem næsti stjóri Cardiff og fyrir því er góð og gild ástæða. Vincent Tan eigandi Cardiff er einnig eigandi Kortrijk þar sem Freyr hefur starfað síðustu níu mánuði og gert vel.

Það væri því leikur einn fyrir Tan að fá Frey til að taka við en Freyr hætti með Lyngby í upphafi árs til að taka við Kortrijk.

Cardiff er á botni B-deildarinnar í Englandi en Freyr ásamt nokkrum öðrum virðast koma til greina sem næsti stjóri liðsins.