Wesley Fofana, leikmaður Chelsea, segir að franskir leikmenn liðsins séu búnir að fyrirgefa Enzo Fernandez fyrir söngva sem hann söng eftir Copa America á árinu.
Fernandez ber oft fyrirliðabandið hjá Chelsea en hann söng rasíska söngva í garð franskra leikmanna eftir sigur á mótinu í júlí.
Mikil reiði var á meðal franskra leikmanna eftir að myndband af atvikinu var birt en Fofana er sjálfur búinn að ræða við Fernandez og vonast til að hann læri af sinni hegðun.
,,Við náðum að leysa úr þessu á mjög góðan hátt. Hann kom til baka, ræddi við félagið og þjálfarann og þeir funduðu saman,“ sagði Fofana.
,,Við útskýrðum fyrir honum hvað hafði verið svo móðgandi því það var mikilvægt fyrir hann að vita það.“
,,Við útskýrðum mál okkar en hann sagðist ekki hafa hugsað með sér að þetta gæti sært einhvern. Hann áttaði sig ekki á að þetta væri svo alvarlegt.“
,,Það besta fyrir alla er að kenna honum og fá hann til að skilja ákveðna hluti, í sumum löndum er tekið illa við svona ummælum.“
