Atletico Madrid er þessa stundina að reyna allt til að losna við sóknarmanninn Joao Felix sem er afskaplega óvinsæll á meðal stuðningsmanna liðsins.

Felix var lánaður til Barcelona á síðustu leiktíð og fyrir undirskriftina viðurkenndi hann að það væri sitt draumafélag.

Það fór ekki vel í stuðningsmenn Atletico sem vilja ekkert með Portúgalann hafa sem var einnig lánaður til Chelsea um tíma.

Samkvæmt enskum miðlum hefur Manchester City fengið tilboð frá Atletico sem vill kaupa sóknarmanninn Julian Alvarez.

Atletico hefur boðið City að fá Felix á láni út tímabilið í skiptum fyrir það að verðmiði argentínska landsliðsmannsins lækki töluvert.

Alvarez er verðmetinn á 75 milljónir punda og er það upphæð sem þeir spænsku geta ekki borgað.