Arsenal gæti mögulega verið að missa mikilvægan mann úr sínu teymi ef marka má frétt UOL í Brasilíu.

UOL segir að Nottingham Forest sé að horfa til Arsenal og vill ráða fyrrum leikmann Lundúnarliðsins, Edu, til starfa.

Edu hefur starfað sem yfirmaður knattspyrnumála hjá Arsenal undanfarin ár og er ansi vinsæll á meðal stuðningsmanna sem og leikmanna liðsins.

Evangelos Marinakis, eigandi Forest, ku vera mikill aðdáandi Edu og vill ráða hann inn sem sína hægri hönd fyrir komandi tímabil.

Það er launahækkun í boði fyrir Brasilíumanninn en það er nóg til af peningum hjá Forest og eigandanum, Marinakis.

Marinakis á meirihluta í þremur liðum í Evrópu en fyrir utan Forest eru það Olympiakos í Grikklandi og Rio Ave í Portúgal.

Edu myndi ekki bara starfa fyrir Forest heldur myndi ráða flestu sem fer fram hjá öllum þessum þremur félögum.