Ederson, markvörður Manchester City, hefur svarað fyrir sig eftir frétt Athletic sem birtist í vikunni.

Þessi frétt vakti töluverða athygli en greint var frá að Ederson væri óánægður með umfjöllun enskra fjölmiðla um liðsfélaga hans, Stefan Ortega.

Ortega kom inná í mikilvægum leik sem tryggði City Englandsmeistaratitilinn í vetur eftir að sá brasilíski hafði meiðst – leikurinn vannst gegn West Ham.

Athletic sagði frá því að Ederson væri pirraður yfir því að Ortega, sem tók við í markinu, væri að fá allt þetta hrós í fjölmiðlum eftir að hafa staðið sig vel eftir innkomuna.

Brassinn segir þó að um lygasögur sé að ræða en að hann hafi þó verið miður sín að geta ekki klárað tímabilið eða spilað með brasilíska landsliðinu á Copa America.

,,Ég vil koma því á framfæri að þessi frétt birt af Athletic þar sem greint var frá að ég væri óánægður með umfjöllun um liðsfélaga minn er byggð á lygi,“ sagði Ederson.

,,Þessi dagur var án efa einn erfiðasti dagur ferilsins en ég meiddist og gat ekki spilað meira á tímabilinu og ekki á Copa America með þjóð minni.“

,,Þegar ég meiddist þá hugsaði ég bara um að halda áfram að spila leikinn, að verja City í baráttunni um titilinn sem við unnum. Að lokum gat ég ekki tekið frekari þátt.“