Freyr Alexandersson, þjálfari Kortrijk, hafnaði tilboði frá Union St. Gilloise um að taka við sem þjálfari liðsins. Hann vildi fá að taka með sér aðstoðarmanninn sinn, Jonathan Hartmann, en fékk það ekki í gegn. Fótbolti.net greinir frá.

Freyr tók við Kortrijk snemma á þessu ári eftir stórkostlegan árangur með Lyngby í Danmörku. Markmið hans var að halda liðinu uppi og þó svo að staðan hafi verið svört tókst Íslendingnum það nú í vor.

Union St. Gilloise er mun stærra lið og var í toppbaráttu í Belgíu á síðustu leiktíð. Liðið tekur þá þátt í undankeppni Meistaradeildar Evrópu á komandi leiktíð og er öruggt með sæti í einhverri af Evrópukeppnunum þremur hið minnsta.

Freyr sagði hins vegar nei takk og réði félagið Sebastien Pocognoli í starfið.