Enski landsliðsmaðurinn Luke Shaw átti að ræða við fjölmiðla í dag en knattspyrnusambandið hætti við og sendi Ivan Toney í staðinn. Því hefur verið velt upp hvort þetta gefi í skyn að bakslag hafi komið upp í endurkomu vinstri bakvarðarins.
Kieran Trippier meiddist í leiknum gegn Slóvakíu í 16-liða úrslitum EM um síðustu helgi. England vann leikinn naumlega.
Shaw hefur ekki spilað síðan í febrúar vegna meiðsla en talið er að hann nálgist endurkomu og byrji jafnvel leikinn gegn Sviss í 8-liða úrslitum á laugardag.
Henry Winter, virtur enskur blaðamaður, greindi hins vegar frá því að Shaw hafi verið skipt út fyrir Toney er kom að því að ræða við fjölmiðla í dag.
Enska knattspyrnusambandið segir það ekkert hafa með heilsu leikmannsins að gera, heldur vilji hann spila á EM áður en hann ræðir við fjölmiðla.
Miðað við það eru enn ágætis líkur á að Shaw spili leikinn gegn Sviss, en þess má geta að hann æfði í dag.
FA insist no big drama around Shaw, no setback, just he’d rather talk only when he’s actually played at #EURO2024
— Henry Winter (@henrywinter) July 3, 2024
