Það eru 99,9 prósent líkur á að hinn eftirsótti Joshua Zirkzee fari frá Bologna í sumar. Þetta segir yfirmaður íþróttamála hjá Bologna og bætir við að félagið sé búið að vera að leita að arftaka hans.

Manchester United hefur mikinn áhuga á Zirkzee. Fyrr í dag var greint frá því að Erik ten Hag væri búinn að funda með leikmanninum og hans fulltrúum.

Ten Hag vill ólmur fá þennan 23 ára gamla sóknarmann til liðs við sig og er United sagt tilbúið að greiða klásúlu í samningi hans við Bologna upp á 40 milljónir punda.

Zirkzee gekk í raðir Bologna frá Bayern Munchen fyrir tveimur árum og átti frábært síðasta tímabil. Nú er hann staddur með hollenska landsliðinu á EM í Þýskalandi.

United er þó ekki eina félagið sem hefur áhuga á honum en AC Milan fylgist einnig með stöðu mála.