UEFA er með athæfi Jude Bellingham í sigri Englands á Slóvakíu í 16-liða úrslitum EM í gær til skoðunar, þvert á það sem hafði komið fram í enskum miðlum.

Eftir ömurlega frammistöðu Englands bjargaði Bellingham liðinu með því að jafna með hjólhestaspyrnu í blálok venjulegs leiktíma. Enska liðið vann svo í framlengingu.

„Hver annar?“ sagði Bellingham eftir að hafa skorað markið en það eru handahreyfingar hans í kjölfarið sem vekja athygli og var því velt upp hvort þær gætu komið honum í vandræði.

Meira
Sjáðu hvað Bellingham gerði í gær og náðist á myndband – Lendir hann í vandræðum?

Sjálfur segir Bellingham að um einkahúmor hafi verið að ræða sem beindist að vinum hans í stúkunni, ekki varamannabekk Slóvakíu eins og hafði verið gefið í skyn.

Enskir miðlar sögðu í morgun að þeir hefðu fengið þær upplýsingar frá UEFA að Bellingham yrði ekki refsað, ekki frekar en Declan Rice sem átti í útistöðum við þjálfara Slóvaka.

Nú segir UEFA hins vegar að hegðun Bellingham sé til skoðunar. England mætir Sviss í 8-liða úrslitum EM og liggja Gareth Southgate og liðsfélagar Bellingham í enska landsliðinu sennilega á bæn og vona að hann verði ekki í banni í þeim leik.