Tveimur leikjum var að ljúka í Bestu deild karla.

Í Kaplakrika tók FH á móti Breiðabliki. Það stefndi í markalausan fyrri hálfleik þegar Ástbjörn Þórðarson kom boltanum í netið fyrir heimamenn, sem leiddu heldur sanngjarnt í hálfleik.

Blikar gerðu ekki það sem til þurfti í seinni hálfleik til að finna jöfnunarmarkið og meira var ekki skorað. Lokatölur 1-0.

Breiðablik er í öðru sæti deildarinnar en nú 4 stigum á eftir toppliði Víkings eftir jafnmarga leiki. FH hefur spilað leik minna en er með 20 stig í fimmta sæti.

ÍA tók þá á móti Val og héldu gestirnir að þeir hefðu komist yfir snemma leiks þegar skot Jónatans Inga Jónssonar fór af Patrick Pedersen og í netið. Danski framherjinn var hins vegar dæmdur rangstæður en í endursýningu má sjá að dómurinn var kolrangur.

Eftir um stundarfjórðungs leik skoraði Jónatan hins vegar og fékk markið að standa. Valsarar komnir yfir. Heimamenn svöruðu þó og Jón Gísli Eyland Gíslason jafnaði á 26. mínútu. Tíu mínútum síðar fór boltinn af Bjarna Mark Antonssyni og í mark Vals. Sjálfsmark og ÍA komið yfir. Staðan í hálfleik var 2-1.

Elfar Freyr Helgason jafnaði fyrir Val með laglegu marki snemma í seinni hálfleik og það stefndi í jafntefli allt þar til Steinar Þorsteinsson skoraði glæsilegt sigurmark Skagamanna á lokamínútu venjulegs leiktíma. Lokatölur 3-2.

ÍA hélt í fjórða sætið með sigrinum, er með 20 stig eins og FH. Valur er í þriðja sæti með 25 stig.