Bjarni Guðjónsson framkvæmdarstjóri KR segir að Gregg Ryder sé að fara að stýra æfingu liðsins í dag og fundi með leikmönnum þessa stundina. Ekki sé búið að reka hann úr starfi. KR tapaði gegn ÍA í Bestu deildinni í gær.

Sú saga hefur flogið í morgun að það standi til að reka Ryder úr starfi og jafnvel að búið væri að því. Málið var meðal annars rætt í Dr. Football

„Það er bara ekki rétt að það sé búið að reka hann, hann er á fundi með leikmönnum núna og er á leið á æfingu með þá,“ sagði Bjarni um málið við 433.is.

Bjarni gat að öðru leyti ekkert tjáð sig um þessar sögur og sagði knattpyrnudeild stýra hlutunum. Páll Kristjánsson hefur ekki svarað 433.is í morgun.

Meira:
Er búið að reka Ryder? – Páll og Bjarni láta ekki ná í sig

Ryder hafði stýrt Þrótti og Þór hér á landi áður en hann fór til Danmerkur. Leit KR að þjálfar síðasta haust var mikið í fréttum en fjöldi þjálfara hafnaði starfinu áður en kom að Ryder.

KR vann fyrstu tvo leiki sumarsins á útivelli en liðið hefur ekki enn unnið leik á heimavelli og er með ellefu stig í Bestu deildinni, aðeins fjórum frá fallsæti.