Víkingur er á toppi deildarinnar en Valur er í þriðja sæti, 4 stigum á eftir.
„Þetta er stórleikur. Sami leikur í fyrra á þessum velli hafði mikið að segja um hvar titillinn endaði. Þetta er aðeins fyrr í mótinu en þá en þetta eru samt leikirnir þar sem þú vilt máta þig við þá bestu. Við erum búnir að ná í 4 stig á móti Breiðabliki í tveimur leikjum en eigum eftir að spila við Val í sumar. Það vilja allir sjá svona leik og taka þátt í svona leik,“ segir Arnar.
Arnar býst við góðum leik og mikilli baráttu.
„Þegar taugaspennuorkan tekur yfir, það er smá merkilegt. Sumir verða rólegir og eflast við það en sumir byrja að brjóta á sér eins og hálfvitar og hinir svara. Það verður hart tekist á, enda mikið í húfi. Valur er búinn að leggja mikið í sitt lið eins og vanalega til að henda okkur af okkar stalli og við erum búnir að bæta í frekar en hitt. Það er búið að ganga vel í sumar. Ég á bara von á epískum leik. Þetta hefur allt til alls. Bæði lið eru í toppstandi og koma inn í leikinn nýbúin að tryggja sér sæti í undanúrslitum í bikar. Á leikdegi er svo dregið í Evrópukeppni. Ef þú ert leikmaður Víkings eða Vals í dag og fílar ekki þessar stundir áttu bara að hætta.“
Víkingur er á leið í undankeppni Meistaradeildar Evrópu á næstunni. Arnar segir útileik við Val einn af fáum leikjum hér á landi sem þú getur undirbúið og farið í eins og Evrópuleik.
„Menn verða að átta sig á að það er ekki hægt að fara í einhverja þvælu þegar þú ferð í Evrópu. Þú þarft að spila agaðan og taktískan leik og nýta þín móment. Þú færð ekki oft tækifæri til að æfa það í íslensku deildinni. Ekki beint út af standard heldur af því Víkingur er meistari og þú sérð aldrei meistarana fara að spila við Fylki, Fram, KR, öll þessi lið og ætlast til að þau spili eitthvað taktískt. Við eigum bara að vinna og dominate-a leikinn. En á móti Breiðabliki og Val á útivelli er þetta meira taktískir leikir. Þú ert ekki að henda þér í allt og fara í einhverja þvælu. Þú ert meira að hafa stjórn á hlutunum með og án bolta. Það er það sem við erum að leitast eftir, það er það sem mun ráða því hvort við gerum eitthvað í Evrópu, auk þess að vinna báða titlana hér heima.“
Ítarlegra viðtal við Arnar er í spilaranum.
