Sjónvarpsmaðurinn Andri Már Eggertsson, Nablinn, var gestur í nýjasta þætti af Íþróttavikunni. Helgi Fannar Sigurðsson og Hrafnkell Freyr Ágústsson hafa umsjón með þættinum.

Mikil umræða hefur verið um dóma sem hafa fallið með Víkingi í Bestu deild karla það sem af er leiktíð. Arnar Gunnlaugsson, þjálfari liðsins, er þó orðinn þreyttur á þessari umræðu.

„Róum okkur aðeins á þessu propaganda sem er í gangi gegn Víkingi. Sem betur fer eru dómarar ekki að falla í gildruna. Þeir halda bara áfram. Mér finnst ganga of langt þegar allir eru farnir að tala um þetta og það er verið að gera þessu góð skil í öllum fjölmiðlum og þess háttar. Svo eru mögulega einhverjir þjálfarar andstæðinga líka sem sjálfir fá svo víti í næsta leik á eftir eða einhver átti að vera rekinn útaf í þeirra liði sem var ekki rekinn útaf. Sem betur fer eru Víkingar ekki að taka þátt í þessari umræðu, allavega ekki liðið eða ég. Ég endurtek enn og aftur, í haust verður það besta liðið en ekki heppnasta liðið sem mun vinna þennan titil og þannig mun það alltaf vera,“ sagði Arnar meðal við Fótbolta.net í vikunni.

Þetta var til umræðu í Íþróttavikunni.

„Mér finnst að lið og menn ættu að hætta að tuða yfir þessu. Ég veit að það eru dómar búnir að falla með Víkingi en það eru líka dómar búnir að falla með Breiðabliki. Við erum ekki með VAR, mætið þeim bara af hörku og hættum að pæla í þessu,“ sagði Hrafnkell.

„Auðvitað er Arnar að búa til „við á móti öllum“ fílinginn, kveikja þannig í sínum mönnum,“ sagði Andri.

Hrafnkell segir þó að umræðan stafi líka af því að Víkingur sé besta liðið.

„Þetta Víkingsdæmi hefur farið úr því að það voru allir með þeim í byrjun yfir í að það séu allir á móti þeim. Þú vilt það miklu frekar. Þú vilt vera góða liðið kannsk í 1-2 ár en svo viltu verða vonda liðið.“

Umræðan í heild er í spilaranum.