Þetta sagði hann í nýjasta þætti Þungavigtarinnar, þar sem heit umræða skapaðist um dómgæslu, aðallega í sambandi við Víking. Vilja margir meina að of margir dómar hafi fallið með Íslands- og bikarmeisturunum það sem af er móti. Arnar Gunnlaugsson, þjálfari Víkings, gagnrýndi þessa umræðu á Fótbolta.net eftir leik liðsins gegn Fylki á sunnudag. Þar skoraði liðið mark eftir að Aron Elís Þrándarsson hafði fengið boltann í höndina.
„Róum okkur aðeins á þessu propaganda sem er í gangi gegn Víkingi. Sem betur fer eru dómarar ekki að falla í gildruna. Þeir halda bara áfram. Mér finnst ganga of langt þegar allir eru farnir að tala um þetta og það er verið að gera þessu góð skil í öllum fjölmiðlum og þess háttar. Svo eru mögulega einhverjir þjálfarar andstæðinga líka sem sjálfir fá svo víti í næsta leik á eftir eða einhver átti að vera rekinn útaf í þeirra liði sem var ekki rekinn útaf. Sem betur fer eru Víkingar ekki að taka þátt í þessari umræðu, allavega ekki liðið eða ég. Ég endurtek enn og aftur, í haust verður það besta liðið en ekki heppnasta liðið sem mun vinna þennan titil og þannig mun það alltaf vera,“ sagði Arnar meðal annars.
Ríkharð Óskar Guðnason vakti athygli á þessum ummælum í Þungavigtinni og beindi þeim að Kristjáni. „Arnar Gunnlaugsson tók þig og einhverja sérfræðinga og pakkaði ykkur saman,“ sagði hann.
Kristján gaf lítið fyrir þetta. „Ég mun halda áfram þangað til að þetta snýst við og réttlætið sigrar.“
Mikael Nikulásson var með þeim félögum í þættinum að vanda. Hann tekur undir með Arnari og segir stuðningsmenn Breiðabliks, þar á meðal Kristján, ekki eiga efni á að tala svona um dómgæsluna í deildinni.
„Þetta er alveg eins með Blika. Þeim var gefinn sigurinn gegn FH í fyrstu umferð, FH átti að fá víti. Víkingur er með einn tapleik og átti ekki að vera pjúra rautt spjald á leikmann HK í fyrri hálfleik þar? Það er svo hlægilegt að hlusta á þetta, sérstaklega að Blikarnir séu að röfla yfir þessu,“ sagði Mikael og benti einnig á umdeilt mark Blika sem fékk að standa í leiknum gegn HK um helgina.
