Axel Óskar Andrésson, varnarmaður KR er lélegasti leikmaður Bestu deildarinnar það sem af er tímabili. Þetta er skoðun Kristjáns Óla Sigurðssonar, fyrrum kantmanns Breiðabliks.
Axel Óskar sem er kraftmikill miðvörður snéri heim úr atvinnumennsku fyrir tímabilið en hefur ekki fundið sitt besta form í Vesturbænum.
Fleiri leikmenn komu heim í KR fyrir tímabilið og einn af þeim var Alex Þór Hauksson. „Alex Þór Hauksson, skugginn af sjálfum sér frá því sem var í Stjörnunni,“ sagði Kristján í Þungavigtinni í dag.
Axel Óskar fékk svo hárblásara frá Kristjáni sem segir hann ekki hafa gert mikið.
„Axel Óskar, lélegasti leikmaður deildarinnar so far. Hann getur ekki neitt, hann er bara stór og sterkur. Það er ekki nóg í efstu deild,“ sagði Kristján.
KR hefur tapað þremur af síðustu fjórum leikjum í deildinni og Kristján telur að Axel fari á bekkinn núna.
„Hann er skelfilegur, alltaf í einhverjum vandræðum. Ég trúi ekki öðru en að Lúkas Magni grýti honum úr liðinu í næsta leik ef Gregg Ryder er með eistu.“
