Nadía Atladóttir, nýr leikmaður Vals, var gestur í nýjasta þætti Íþróttavikunnar. Helgi Fannar Sigurðsson og Hrafnkell Freyr Ágústsson hafa umsjón með þættinum.
Þar var að sjálfsögðu rætt um kvennalandsliðið sem hóf leik í undankeppni EM á dögunum. Liðið vann Pólland 3-0 heima en tapaði 3-1 gegn Þjóðverjum ytra.
„Mér fannst þær góðar á móti Póllandi. Allt virkaði frekar vel, uppleggið og þess háttar. En mér fannst þær svolítið slappar á móti Þýskalandi, opnar og þegar þú ert að spila á móti liði eins og Þýskalandi verður þú að nýta færin þín betur. Þær fengu góð færi í stöðunni 1-0 og Ingibjörg átti náttúrulega bara að setja hann eftir aukaspyrnuna. Ég held að liggur við hver sem er hefði skorað svo það var frekar vont að hafa hafsent í þessari stöðu,“ sagði Nadía.
Hún hefði viljað sjá íslenska liðið aðlagast því betur að Sveindís Jane Jónsdóttir hafi farið meidd af velli fyrir Bryndísi Örnu Níelsdóttur.
„Sveindís fór út af og mér fannst þær halda áfram með þessa löngu bolta. Þú verður að geta breytt leikplaninu. Bryndís er ekki svoleiðis leikmaður.“
Umræðan í heild er í spilaranum.
