Staða Gylfa Þórs Sigurðssonar hjá danska félaginu Lyngby hefur verið til umræðu undanfarna daga í kjölfar þess að íslenski þjálfarinn Freyr Alexandersson yfirgaf félagið.

Freyr er tekinn við KV Kortrijk í belgísku úrvalsdeildinni. Hann fékk Gylfa til Lyngby í haust og hefur skilað frábæru starfi fyrir félagið undanfarin tvö og hálft ár.

„Nú er Freysi farinn. Gæti Gylfi ekki farið fram á það ef það er eitthvað í pípunum að losna í janúar á meðan glugginn er opinn?“ spurði Ríkharð Óskar Guðnason í Þungavigtinni.

Sparkspekingurinn Mikael Nikulásson tók til máls en hann telur að framtíð Gylfa velti á því að hann komi sér almennilega af stað á fótboltavellinum. Þessi markahæsti landsliðsmaður í sögu Íslands hefur glímt við meiðsli frá því hann sneri aftur í haust.

„Eigum við ekki bara að byrja á að sjá hvort Gylfi Þór Sigurðsson verði eitthvað mikið meira í fótbolta? Hann er frábær í fótbolta og var frábær í einhverjum bikarleik með Lyngby þar sem hann gerði tvö mörk, um svipað leyti og þessi Liechtenstein leikur (þar sem Gylfi skoraði tvö) var. Hvað hefur hann gert fyrir utan það? Hann er búinn að vera meiddur síðan hann byrjaði,“ sagði Mikael.

Eins og flestir vita hafði Gylfi ekki spilað fótbolta í meira en tvö ár fyrir endurkomuna til Lyngby en þar áður var hann hjá Everton.

„Það er hrikalega erfitt að koma til baka eftir svona. Ég held að þetta setji strik í reikninginn hjá Lyngby. En ég veit ekki hvaða lið ættu að vera að spá í honum núna. Það eru milljónir leikmenn í heiminum. Gylfi er frábær fótboltamaður en eru einhver stærri lið en Lyngby að fara að taka séns á honum? Hann þarf að spila í tvo mánuði án þess að meiðast svo eitthvað fari að gerast.

Hann verður að fara að komast í gang. Ef hann gerir það, þá held ég að hann verði ekki mikið lengur í Lyngby,“ sagði Mikael að lokum um málið.