Vanda Sigurgeirsdóttir, formaður Knattspyrnusambands Íslands, mætti í sjónvarpsþáttinn 433.is í gærkvöldi. Þátturinn er á dagskrá Hringbrautar alla mánudaga.

Í þættinum var það meðal annars rifjað upp þegar Vanda ræddi við Heimi Hallgrímsson um að taka hugsanlega við íslenska karlalandsliðinu á sínum tíma.

Mörgum þótti það óheppilegt en Arnar Þór Viðarsson er þjálfari liðsins.

„Ég lít á það sem mitt hlutverk að vera alltaf að meta stöðuna og horfa fram veginn,“ segir Vanda.

„Arnar hefur fullt traust. Hann er landsliðsþjálfarinn. Við erum að fara í afskaplega spennandi ár.“

Vanda segir það einfaldlega hluta af fótboltanum að taka stöðuna af og til og sjá hvort eitthvað sé hægt að bæta.

„Svona er bara fótboltinn. Ég var þjálfari í 30 ár og hef verið rekin.“

Fréttir af samtali Vöndu og Heimis birtust skömmu eftir að Ísland hafði sótt góð úrslit í leik við Albaníu og segir hún tímasetninguna hafa verið óheppilega.

„Samtalið átti sér samt ekki stað á þeim tíma.“

Hér að neðan má sjá umræðuna sem og þáttinn í heild.