Bruno Fernandes segir að hann hafi stundum efast um sjálfan sig á erfiðum köflum Manchester United á þessari leiktíð.
Fyrirliðinn ræddi við fjölmiðla eftir magnaðan endurkomusigur United á Aston Villa í gær, en liðið hefur átt erfitt uppdráttar það sem af er leiktíð.
„Trúin þarf að vera til staðar því ef hún fer verður þetta mjög erfitt,“ sagði Fernandes.
„Þegar gengur svona illa byrjar þú að hugsa: Er ég nógu góður til að vera hérna? Það er eðlilegt þegar hlutirnir eru ekki að ganga upp. Þetta snýst um hvernig þú bregst við þegar hlutirnir eru ekki að ganga upp.“
Fernandes segir að leikmenn United hafi allan tímann haft trú á því að liðið gæti komið til baka í leiknum í gær.
„Við vissum að ef við gætum skorað fyrsta mark seinni hálfleiksins gætum við snúið þessu við. Við höfum æft mikið til að búa til færi og mörk.
Sem leikmaður Manchester United veistu að þú munt fá gagnrýni en þú þarft að geta tekist á við það og spilað á þessu stigi,“ sagði Fernandes.
