Arnar Gunnlaugsson þjálfari Víkings átti fund með sænska félaginu, Norrköping í síðustu viku en hefur síðan þá ekkert heyrt frá félaginu. Hann veit ekki hvort viðræður haldi áfram en segist alveg rólegur yfir stöðunni.

Arnar sem unnið hefur sex titla með Víking veit ekki hver staðan á ferlinu er en sænska félagið leitar sér að þjálfara.

„Ég fer fyrir viku síðan á Zoom fund með þeim, ég hef ekkert heyrt neitt síðan. Ég veit ekki hvort þeir hafi haft aftur samband við Víking,“ segir Arnar í samtali við 433.is um stöðu mála.

Hann telur að ef viðræður haldi áfram þá þurfi hann að fara til Svíþjóðar. „Ég hefði haldið að næsta skref væri face to face fundur en það hefur ekkert gerst frá fyrsta fundi,“ segir Arnar.

Hann segist mjög rólegur yfir stöðunni, spennandi tímar séu framundan í Víkinni þar sem liðið á sér þann draum að komast langt í Evrópu. „Ég er silkislakur, það eru tvö ár eftir hjá Víkingi. Það er gaman að vera orðaður við svona starf og vera í myndinni en það er líka mjög spennandi tímabil framundan hjá Víkingi.“

Arnar hefur verið orðaður við fleiri lið erlendis en Norrköping er í ráðningaferli sínu og ekki útilokað að félagið fari í ítarlegri viðræður við Arnar um starfið.