Þeir Valdimar Daði Sævarsson og Norðmaðurinn Eirik Brennhaugen munu ganga til liðs við Gróttu að samningum sínum loknum. Báðir skrifuðu þeir undir tveggja ára samning.

Valdimar Daði er úr Vesturbænum og hefur leikið með KV og Þór síðustu ár í Lengjudeildinni við góðan orðstír. Þá á hann einnig leiki að baki með yngri landsliðum Íslands. Valdimar er 21 árs gamall kantmaður sem getur leyst ýmsar stöður fram á við.

„Við erum virkilega ánægð að hafa klófest Valda. Hann er enn ungur og efnilegur og við sjáum fram á að geta þróað hann í hann í kantmann í hæsta gæðaflokki. Hann er virkilega efnilegur en þrátt fyrir ungan aldur hefur hann mikla leikreynslu. Það er mikil vinna fram undan og við erum spenntir fyrir þróun hans,“ sagði Chris Brazell þjálfari meistaraflokks.

Eirik Brennhaugen er 23 ára örfættur varnarmaður sem kemur frá Noregi. Eirik lék síðast með liði Stjørdals-Blink og Ranheim þar á undan, en hann á yngri landsleiki að baki fyrir Noreg. Eirik er þjálfari og hefur þjálfað í akademíu Rosenborg síðustu ár. Hann mun einnig koma að þjálfun yngri flokka Gróttu.

Chris telur Eirik passa vel inn í Gróttuliðið: „Við teljum að Eirik passi vel inn í hugmyndafræði okkar. Síðustu misseri höfum við fundið leikmenn erlendis frá sem eru faldir gimsteinar. Grótta gefur þeim færi á þróa sinn leik og færa sig ofar í fótboltaheiminum. Síðustu ár höfum við fundið leikmenn með fjölbreyttan bakgrunn sem eru fyrirmyndir fyrir unga iðkendur Gróttu. Eirik passar fullkomlega í það en fyrst og fremst teljum við hann mikið efni á fótboltavellinum.“