Helgi Fannar Sigurðsson skrifar frá Kaupmannahöfn

Í dag er dagurinn sem margir hafa beðið eftir. Gylfi Þór Sigurðsson er í hóp Lyngby sem mætir Vejle í dönsku úrvalsdeildinni.

Um tíma var hreinlega óvissa um það hvort Gylfi myndi stíga aftur á knattspyrnuvöllinn en eftir 852 daga á hliðarlínunni virðist það ætla að rætast.

Gylfi er einn fremsti, ef ekki sá fremsti, knattspyrnumaður sem við Íslendingar höfum átt og endurkoman því þýðingarmikil fyrir marga. Auðvitað vonast allir til að kappinn hafi engu gleymt þrátt fyrir langa fjarveru og að við sjáum Gylfa leika listir sínar eftir langa fjarveru á Lyngby-leikvanignumí kvöld.

Hinn 34 ára gamli Gylfi var auðvitað um árabil okkar besti landsliðsmaður. Hornspyrnur jafnt sem aukaspyrnur urðu að dauðafærum þegar hann var inni á vellinum. Gylfi á að baki 78 A-landsleiki fyrir Íslands hönd og hefur skorað í þeim 25 mörk. Vonir standa auðvitað til um að endurkoma hans á völlinn með Lyngby þýði að 79. landsleikurinn sé í nánd. Gylfa hefur allavega verið sárt saknað undanfarin ár, á sama tíma og íslenska karlalandsliðið hefur dalað allsvakalega.

Allt saman hefst þetta þó hér í Lyngby. Hvað gerist í kjölfarið kemur í ljós.

Leikurinn hefst klukkan 17 að íslenskum tíma. 433.is er á staðnum og flytur ykkur fregnir frá dönsku höfuðborginni.