Jóhann Berg Guðmundsson, fyrirliði íslenska landsliðsins, segir að það hafi verið erfitt fyrir leikmenn að kyngja tapinu gegn Lúxemborg á föstudag. Leikmenn séu hins vegar komnir með hugann við næsta verkefni og staðráðnir í að gera betur.

Íslenska liðið tapaði 3-1 gegn Lúxemborg í undankeppni EM 2024 á föstudag og er vonin um að komast á lokamótið í gegnum undankeppnina orðin ansi veik.

„Þetta var mjög erfitt, erfiður leikur og erfitt að taka þessu tapi,“ sagði Jóhann á blaðamannafundi í Laugardal fyrir næsta leik gegn Bosníu-Hersegóvínu á morgun.

Frammistaða Strákanna okkar í leiknum var alls ekki upp á marga fiska. Jóhann var spurður út í dagana eftir tapið.

„Við náðum ekki þeim markmiðum sem við settum fyrir leikinn og það er auðvitað svekkjandi. Menn hafa sólarhring til að hugsa um þetta og svo er það bara næsti leikur og við þurfum að gera betur þar. Það er alveg klárt.

Við erum þannig séð búnir að gleyma Lúxemborg og mistökunum sem við gerðum þar og getum breytt því á morgun og spilað betri leik því við vitum allir að þetta var ekki nógu gott.“

Jóhann var einnig spurður út í það hvað hann telji hafa valdið tapinu og frammistöðunni á föstudag.

„Það er erfitt að segja til um það, sérstaklega þegar við fáum mark á okkur mjög snemma. Það hjálpaði ekki liðinu, það er alveg klárt. Þá ákváðum við að fara enn ofar, pressa þá hærra. Við vorum ekki að fara að setja til baka 1-0 undir á móti Lúxemborg. Þá fengu þeir fleiri færi.

Einstaklingsmistök er eitthvað sem má ekki gera á þessu leveli, sérstaklega ekki svona aftarlega á vellinum. Við verðum að vera betri varnarlega á morgun.“