Eins og fram kom fyrr í sumar er Stöð 2 Sport komið með sýningarréttinn á leikjum íslenska karlalandsliðsins í fótbolta á nýjan leik. Nú greinir Sýn frá því að allir leikir Íslands verði í opinni dagskrá.
Sýn tók í sumar yfir Viaplay á Íslandi, sem hefur sýnt leiki íslenska karlalandsliðsins undanfarið.
Allir leikir Íslands á þessu ári verði í opinni dagskrá, þar með taldið eru því leikirnir gegn Lúxemborg og Bosníu-Hersegóvínu síðar í þessum mánuði.
Guðmundur Benediktsson mun lýsa leikjunum. Kjartan Atli Kjartansson mun stýra umfjöllun og Kári Árnason og Lárus Orri Sigurðsson verða á meðal sérfræðinga.
Tilkynning Sýnar
Fyrr í sumar tryggði Stöð 2 Sport sér sýningarréttinn að leikjum íslenska karlalandsliðsins í knattspyrnu næstu árin og má því með sanni segja að strákarnir okkar séu komnir aftur heim.
Það er okkur mikið ánægjuefni að tilkynna að Stöð 2 Sport, N1 og Netgíró hafa tekið höndum saman og bjóða þjóðinni upp á alla leiki liðsins út árið í opinni dagskrá. Fyrstu landsleikirnir á Stöð 2 Sport verða 8. september gegn Lúxemborg ytra og 11. september gegn Bosníu og Hersegóvínu á Laugardalsvelli.
Áhorfendur geta nú notið þess að horfa á strákana okkar í bestu mögulegu myndgæðum auk þess sem mikið verður lagt í umfjöllun um leikina. Guðmundur Benediktsson mun lýsa leikjunum en umfjöllun verður í umsjón Kjartans Atla Kjartanssonar. Sérfræðingar Stöðvar 2 Sports um landsliðið verða meðal annarra Kári Árnason og Lárus Orri Sigurðsson sem báðir eru margreyndir landsliðs- og atvinnumenn í knattspyrnu.
Yngvi Halldórsson, forstjóri Sýnar: „Okkur finnst frábært að geta fagnað því að íslenska landsliðið sé komið heim til okkar á Stöð 2 Sport með því að bjóða upp á næstu leiki liðsins í undankeppni EM 2024 í opinni dagskrá með okkar góðu samstarfsaðilum, N1 og Netgíró. Nú eru afar mikilvægir leikir fram undan hjá strákunum okkar. Liðið hefur staðið sig vel og erum við stolt að geta verið hluti af þessari vegferð með þeim. Áfram Ísland!“
Vanda Sigurgeirsdóttir, formaður KSÍ: „Ég hlakka mikið til að fylgjast með umfjöllun Stöðvar 2 Sports um strákana okkar enda mikil reynsla og þekking þar á bæ og ég veit að landsliðinu verða gerð góð skil. Liðið er á ákveðinni vegferð undir stjórn þjálfarans Åge Hareide og í leikmannahópnum eru reynslumiklir menn í bland við yngri og afar spennandi leikmenn. Svo má auðvitað reikna með að það gleðji þjóðina að geta séð leikina í opinni dagskrá, sem er mikilvægt, því við viljum að stuðningsmenn á öllum aldri sem ekki komast á völlinn til að styðja íslenska liðið geti horft í sófanum heima.“
Allir aðrir leikir í undankeppni EM 2024 verða sýndir á Viaplay og valdir leikir á Vodafone Sport, sem er nú hluti af Sportpakka Stöðvar 2 Sport.
