Viðar Örn Kjartansson framherji Atromitos Athen í Grikklandi hefur ekki fengið að spila undanfarið. Ástæðan virðist vera sú að hann vill fá laun fyrir vinnuna sína.
Fjallað var um málið í Dr. Football í dag en þar segir að Viðar hafi leitað til FIFA til að reyna að fá laun sín greidd. Hann gekk í raðir félagsins síðasta sumar.
„Í byrjun árs hafði Viðar Örn samband við FIFA, hann átti inni laun. Við höfum heyrt sögur frá Tyrklandi þar sem þú færð greitt seint og síðar meir,“ segir Hjörvar Hafliðason í þætti sínum í dag.
Hjörvar segir að hinn margreyndi Chris Coleman þjálfari Atromitos megi ekki nota Viðar núna, þau skilaboð koma frá þeim sem ráða. „Sunnlendingurinn var ekki að fara láta það yfir sig ganga, hann hafði samband við FIFA. Eftir það hefur Chris Coleman ekki mátt horfa á hann.“
„Þessi gríska ofurdeild, ef þið skoðið hvernig leikir fara. 1-0, 1-0. Ómögulegt að skora þarna,“ segir Hjörvar.
Hjörvar segir næsta víst að Viðar fari frá Grikklandi í sumar og að tilboð séu á hans borði. „Eftir að hann hafði samband við FIFA; þá má Cris ekki horfa á hann. Hann er pottþétt að fara á nýjan stað.“
