Nú klukkan 19 hefst leikur Real Madrid og Manchester City í undanúrslitum Meistaradeildar Evrópu.
Um fyrri leik liðanna er að ræða og verður spilað í Madríd. Í hinu undanúrslitaeinvíginu mætast nágrannaliðin AC Milan og Inter.
Lið City hefur litið ógnvænlega út undanfarið og gæti unnið þrennuna eftirsóttu á leiktíðinni. Kári Árnason varar fólk þó við því að afskrifa Real Madrid fyrir kvöldið í Meistaradeildarupphitun Viaplay.
„Það eru allir að tala um að Manchester City muni rúlla yfir Real Madrid. Þeir verða kannski miklu betri en þú getur ekki veðjað gegn Real Madrid. Ég hef gert það í beinni og það kom í bakið á mér,“ segir Kári fyrir stórleik kvöldsins.
Rúrik Gíslason er með honum í setti Viaplay og telur hann Real Madrid ekki alveg vera á sama stað og í fyrra, þegar liðið henti City úr leik á þessu stigi.
„Miðað við Real Madrid í fyrra og núna, ég veit ekki hvað það er, en ég hef ekki séð sömu geðveiki og í fyrra.“
