„Ég lít á þessa ráðningu sem gott skref fyrir íslenskan fótbolta. Við erum að fá inn öflugan mann með mikla reynslu. Það var það sem við horfðum til,“ sagði Jörundur Áki Sveinsson, sviðsstjóri knattspyrnusviðs KSÍ, við 433.is í kjölfar þess að nýr landsliðsþjálfari, Åge Hareide, var kynntur fyrir blaðamönnum og íslensku þjóðinni í Laugardal í dag.

Jörundur hefur verið í samskiptum við Hareide undanfarna daga. „Strax á fyrsta fundi leist mér vel á manninn.

Hann er hafsjór af fróðleik og er með sterkar skoðanir. Þetta landsliðsumhverfi þekkir hann eins og lófan á sér. Ég tel að þetta sé akkúrat maðurinn sem við þurfum.“

Hareide er með mikla reynslu af landsliðsfótbolta, þar sem hann hefur stýrt Noregi og Danmörku. Það hafði mikið að segja þegar hann var ráðinn til að stýra liðinu.

„Við vitum að landsliðsfótboltinn er frábrugðin félagsliðafótboltanum. Þú verður að vinna til að halda þér í einhverri stöðu. Hann er bara með eitt markmið og það er að vinna fótboltaleiki.

Hann gefur leikmönnum sínum frelsi en vill líka að þeir virði ákveðin mörk og reglur. Hann leggur mikið upp úr því að vera í miklum samskiptum við leikmenn og starfsfólk. Það heillaði.“

Viðtalið í heild er hér að neðan.