Besta deild karla hefst í dag með heilli umferð og er eftirvæntingin mikil.
Leitað var til stuðningsmanna liðanna í deildinni og lagður fyrir þá spurningalisti.
Sparkspekingurinn Kristján Óli Sigurðsson svaraði fyrir hönd sinna manna í Breiðabliki. Liðið freistar þess að verja Íslandsmeistaratitil sinn.
Hvernig líst þér á sumarið hjá þínu liði?
Mér líst vel á sumarið og hlakka mikið til að sjá boltann rúlla af stað. Krafan í Kópavoginum er að verja skjöldinn góða og vonandi gengur það betur en 2011.
Hvernig finnst þér hafa gengið að styrkja leikmannahópinn?
Það hefur gengið ágætlega þó svo að erfitt verði að fylla alveg í skarðið sem Dagur Dan og Ísak skilja eftir sig en þá bind ég miklar vonir við Patrik, Stefán Inga, Eyþór og Alex Frey. Eins kemur Arnór Sveinn með gríðarlega reynslu í hópinn og risastórt grænt hjarta.
Hver er uppáhalds leikmaðurinn þinn í liðinu?
Erfitt að gera upp á milli Gísla, Höskuldar og Jasons Daða. En þegar Jason er á deginum sínum er hann besti leikmaður deildarinnar svo hann fær mitt atkvæði. En til að halda friðinn á heimilinu verð ég líka að nefna stjúpson minn Dag Örn Fjeldsted sem fær vonandi tækifæri með besta liði landsins í sumar.
Ertu dugleg/ur að mæta á völlinn hjá þínu liði?
Já ég reyni að mæta á alla leiki sem ég get þó kemur fyrir að golfvöllurinn hafi vinninginn.
Fyrir utan heimavöllinn hjá þínu félagi, hvar er skemmtilegast að fara á völlinn?
Kaplakriki er á toppnum þarna í dag. KR völlurinn var það en það eins og að fara í tímavél í dag að mæta í Vesturbæinn á leiki.
Hvað finnst þér um fyrirkomulagið í Bestu deildinni sem var prófað í fyrsta sinn á síðustu leiktíð?
Mér líst vel á það og fín leið til að fjölga leikjum. Baráttan um titilinn varð aldrei nógu mikil í fyrra til þess að fá fulla velli í síðustu umferðunum en ég gæti trúað að það verði þannig í ár og þá verður þetta algjör veisla.
Hvaða lið verður Íslandsmeistari?
Íslandsmeistararnir verja titilinn með kjafti og klóm. Breiðablik.
