Paul Merson, fyrrum knattspyrnumaður og í dag sparkspekingur á Sky Sports segir að Liverpool eigi ekki möguleika gegn Real Madrid í Meistaradeild Evrópu í kvöld.
Um seinni leik liðanna í 16-liða úrslitum er að ræða en þeim fyrri lauk með 5-2 sigri Real Madrid á Anfield.
„Maður horfir á leik þeirra gegn Bournemouth og hugsar: Hvaða möguleika á Liverpool gegn Real Madrid? Þeir þurfa að skora allavega þrjú mörk. Það er ansi mikið vekefni,“ segir Merson.
Merson bendir á að lið hafi áður komið til baka í Meistaradeildinni en hefur hins vegar ekki trú á Liverpool.
„Þetta yrði eitt stærsta afrek í sögu Meistaradeildarinnar. Barcelona kom til baka gegn PSG en það var á heimavelli. Þetta er á útivelli gegn meisturunum.
Ef þetta væri tveggja marka munur þá væri aldrei að vita en þrjú mörk, þeir eiga ekki séns.“
Leikur Real Madrid og Liverpool hefst klukkan 20.
