Nottingham Forest tók á móti Manchester United í fyrri leik liðanna í undanúrslitum enska deildabikarsins í gærkvöldi.

Gestirnir voru sterkari í fyrri hálfleik og komust yfir strax á sjöttu mínútu með marki frá hinum sjóðheita Marcus Rashford eftir sendingu frá Casemiro, sem var að snúa aftur eftir leikbann.

Sam Surridge hélt að hann væri að jafna fyrir Forest um miðjan fyrri hálfleik en markið var dæmt af með aðstoð VAR.

Það var svo nokkuð liðið á fyrri hálfleikinn þegar Erik ten Hag brjálaðist út í Bruno Fernandes. United var þá í góðri stöðu fyrir utan teig og Portúgalinn með nægan tíma. Hann ákvað hins vegar að skjóta að marki en boltinn fór hátt yfir. Ten Hag hafði engan húmor fyrir þessu og lét Fernandes heyra það.

Rauðu djöflarnir komust svo í 0-2 fyrir leikhlé. Wout Weghorst skoraði sitt fyrsta mark fyrir United er hann kom boltanum í netið í kjölfar þess að skot Antony var varið.

Lítið var um að vera lengi vel í seinni hálfleik en United gerði sig líklegt undir lokin. Það skilaði sér í marki Fernandes með frábærri afgreiðslu.

Lokatölur 0-3 og staða United í einvíginu afar væn fyrir seinni leikinn eftir viku.