Þeir gerast ekki mikið stærri gestirnir en sá sem fenginn var í Íþróttavikuna með Benna Bó í þetta skiptið. Forseti Íslands, Guðni Th. Jóhannesson, sat þá í setti ásamt Herði Snævari Jónssyni, fréttastjóra íþrótta á Torgi.

Sara Björk Gunnarsdóttir hefur heldur betur verið í fréttum undanfarna daga eftir að grein hennar kom út. Þar lýsir hún slæmu viðhorfi Lyon gagnvart sér er hún var ólétt að syni sínum og eftir að hún eignaðist hann. Hún vann að lokum mál gegn félaginu.

„Það var frábært framtak hjá henni. Þessi barátta hennar mun skila árangri, ekki bara fyrir hana, heldur íþróttakonur í fleiri greinum og um víða veröld. Við eigum að fagna því að hún hafi ekki látið vaða yfir sig í Lyon,“ segir Guðni.

„Hlutirnir gerast aldrei af sjálfu sér. Við erum blessunarlega á réttri leið þegar kemur að jafnrétti kynjanna í íþróttum. En sú var tíð að þær þyrftu að fá nýtt búningasett og þá var gamla settinu af strákunum hent í þær. Það þætti óþolandi í dag rétt eins og að eftir nokkur ár verður það óþolandi að litið sé svo á knattspyrnukonu sem hefur orðið þunguð að það sé einhver svakalegur skellur sem eigi ekki að þola. Það verður liðin tíð eftir nokkur ár.“

Hörður var ánægður með grein Söru en framganga Lyon kom honum á óvart.

„Það kom skemmtilega á óvart hversu víða þetta fór. Það segir kannski ýmislegt um þann prófíl sem Sara er í heimsfótboltanum, afrek hennar tala fyrir sig. En það kom manni gríðarlega á óvart að svona stór klúbbur eins og Lyon sé að reyna snuða leikmennina sína um þessa peninga, 12 milljónir króna, fyrir klúbb eins og Lyon eru það smáaurar í stóra samhenginu.

Þegar fram líða stundir munu félögin ekki gera svona því þau sjá hvaða afleiðingar það hefur.“

Umræðan í heild er hér að neðan.