Jack Grealish leikmaður Manchester City hefur fengið meira en nóg af því að horfa og hlusta á Graeme Souness gagnrýna sig í beinni útsendingu í sjónvarpinu.
Souness hefur gagnrýnt Grealish nokkuð harkalega eitthvað sem Grealish hefur fengið nóg af.
„Ég veit ekki hvaða vandamál Souness glímir við í kringum mig, hann er alltaf að tala um mig,“ sagði Grealish.
„Það er erfitt að sjá þetta ekki þegar hann er á Sky Sports og þetta er út um allt á æfingasvæðinu okkar. Hann var frábær leikmaður og vann mikið en ég veit ekki hvert vandamálið er.“
Grealish hefur ákveðið að hlusta frekar á það sem Pep Guardiola stjóri City hefur að segja frekar en Souness.
„Ég veit að hann talar mikið um að ég hreyfi boltann ekki nóg en þegar ég spila fyrir Pep Guardiola og hann segir mér að halda í boltann eins mikið og ég get og vera hugrakkur þá geri ég það,“ segir Grealish.
City borgaði 100 milljónir punda fyrir Grealish þegar hann kom sumarið 2021 en hann hefur ekki fundið sitt besta form.
„Ég horfi alltaf á leikina mína aftur og gagnrýni mig. Ég veit að það voru leikir á síðustu leiktíð undir restina þar sem ég var ekki góður.“