Todd Boehly, eigandi Chelsea, varð ekki sá vinsælasti á dögunum þegar hann stakk upp á því að spilaður yrði árlegur Stjörnuleikur í ensku úrvalsdeildinni, líkt og þeim sem þekkist í NBA-körfuknattleiksdeildinni vestanhafs.
Sjálfur er Boehly bandarískur og telur að enski fótboltinn geti horft meira til Bandaríkjanna í leit að innblæstri.
Eiður Smári Guðjohnsen er goðsögn hjá Chelsea eftir að hafa spilað með félaginu á leikmannaferli sínum. Hann tjáði sig um ummæli Boehly í Vellinum á Símanum Sport í gær.
„Hversu amerískt getur það verið? Ég held að hann hafi ekki orðið neitt vinsæll eftir þessa hugmynd,“ sagði Eiður.
„Mér fannst þetta svo mikið bull að ég nennti ekki einu sinni að spá í þessu.“
Eiður, sem í dag þjálfar karlalið FH, lék með Chelsea frá 2000 til 2006. Þaðan fór hann svo til Barcelona. Eiður skoraði 78 mörk í 262 leikjum fyrir enska félagið.