Árangur Vals í sumar hefur verið undir væntingum en liðið virðist þó vera að rétta úr kútnum og hefur náð í sjö stig í síðustu þremur leikjum.
Aron Jóhannsson hefur komið til baka eftir smávægileg meiðsli og byrjað síðustu tvo leiki liðsins en með Aron í byrjunarliðinu hefur Valur náð góðum árangri.
Aron kom heim úr atvinnumennsku fyrir þetta tímabil og hefur byrjað níu leiki með Val í Bestu deildinni í sumar. Í þeim leikjum hefur Valur unnið sjö, gert eitt jafntefli og tapað einum.
Með Aron í byrjunarliðinu er Valur með 2,44 stig að meðaltali í leik en með Aron utan byrjunarliðsins er Valur með 0,71 stig í leik. Sem dæmi er Breiðablik með 2,37 stig að meðaltai í leik en liðið er það besta í deildinni í sumar.
„Aron hefur sýnt það i sumar að hann er töluvert betri en aðrir leikmenn i þessari deild. Sendingar, móttaka, yfirsýn og leikskilningur er einfaldlega betri en hjá öðrum. Sending hans i öðru marki Vals gegn FH sýndi allar hans bestu hliðar. Það var unaður að sjá það mark frá A-Ö,“ segir Benedikt Bóas Hinriksson Valsar og einn af stjórnendum Vængjum þöndum sem er hlaðvarp Valsmanna.
„Nærvera hans inn a vellinum sýnir líka hvað Vals liðið er miklu betra þegar hann er inná. Eftir að Jasper fór i miðvörðinn hefur spilamennskan breyst til hins betra. Patrik fær boltann a betri stað og Aron vinnur nálægt Patrik. Það er einföld uppskrift sem virkar. “
Stuðningsmenn Vals eru ánægðir með Aron. „Aron er i miklu uppáhaldi hjá Vængjunum og við erum bæði stoltir og glaðir að hann svífi um i fallegu rauðu treyjunni okkar.“