Miklar breytingar hafa orðið á vörn Chelsea í sumar.

Þeir Antonio Rudiger og Andreas Christensen yfirgáfu félagið fyrr í sumar fyrir Real Madrid og Barcelona. Þá virðist Marcos Alonso á leið til síðarnefnda félagsins.

Í staðinn eru komnir þeir Kalidou Koulibaly, fyrir 34 milljónir punda frá Napoli, og Marc Cucurella, fyrir 62 milljónir punda frá Brighton.

Chelsea ætlar sér að bæta við sig öðrum miðverði í sumar. Þar er Wesley Fofana hjá Leicester efstur á óskalista félagsins.

Leicester hefur þegar hafnað tveimur tilboðum Chelsea í leikmanninn og vill helst ekki selja hann fyrr en í næsta sumar.

Samkvæmt Evening Standard hyggst Chelsea aftur á móti bjóða í þriðja sinn í hinn 21 árs gamla Fofana.

Síðasta tilboð Chelsea hljóðaði upp á 70 milljónir punda og var því hafnað af Leicester. Síðarnefnda félagið hefur áður sagt að Lundúnafélagið þurfi að gera Fofana að dýrasta varnarmanni heims, ætli það sér að fá hann.

Í dag er Harry Maguire dýrasti varnarmaður sögunnar. Hann kom einmitt frá Leicester til Manchester United á 80 milljónir punda sumarið 2019.

Rífi Chelsea upp veskið fyrir Fofana er því ljóst að félagið verður búið að eyða um 30 milljörðum íslenskra króna í varnarmenn í félagaskiptaglugganum í sumar.