Chelsea hefur reynt og reynt að fá til sín miðverði í sumar en fjölmargir leikmenn hafa verið orðaðir við félagið.

Chelsea hefur nú þegar misst af þónokkrum leikmönnum og ku nú vera að horfa til Leicester og vill fá Wesley Fofana í sínar raðir.

Samkvæmt blaðamanninum virta Fabrizio Romano er Fofana hins vegar ánægður í herbúðum Leicester og gæti reynst erfitt að fá hann yfir til London.

Leicester mun alls ekki hleypa leikmanninum burt ódýrt en hann er enn aðeins 21 árs gamall og hefur leikið með liðinu frá árinu 2020.

,,Wesley Fofana er ennþá þarna, það er nafn sem er á lista Chelsea og er leikmaður sem Thomas Tuchel er hrifinn af. Það verður ekki auðvelt að ræða við Leicester því þeir framlengdu samning hans fyrir nokkrum mánuðum,“ sagði Romano.

,,Leikmaðurinn er mjög ánægður hjá Leicester en á sama tíma er Chelsea stórt tækifæri fyrir hann og þetta er líka stórt tækifæri fyrir Chelsea að fá svona hafsent í sínar raðir.“