Myndbandsdómarinn Mike Dean viðurkennir að hann hafi gert mistök í leik Chelsea og Tottenham um síðustu helgi.
Harry Kane skoraði jöfnunarmark Tottenham seint í uppbótartíma. En í aðdragandanum hafði Cristian Romero, varnarmaður Tottenham, togað í hár Cucurella. Ekkert var dæmt og mark Kane fékk að standa.
„Á þeim fáu sekúndum sem ég hafði til að skoða atvikið þar sem Romero togaði í hárið á Cucurella leit þetta ekki út fyrir að vera brot. Síðan þá hef ég skoðað þetta mikið, rætt við aðra dómara og eftir á að hyggja hefði ég átt að spyrja (Anthony) Taylor um að fara og skoða skjáinn,“ segir Dean.
„Dómarinn á vellinum hefur alltaf lokaorðið. Þetta sýnir að sama hversu mikla reynslu þú hefur, ég hef dæmt í úrvalsdeildinni í meira en tvo áratugi, þá er maður alltaf að læra. Þetta eru mikil vonbrigði fyrir mig því þetta var eitt atvik um helgi sem var annars mjög góð hjá okkur dómurum.“